SIDS SIBU NGATUR PEKIT NENUN PUA KUMBU 2014

NGETANKA ASIL PENGELANDIK JARI ASAL: Alice (duduk, tiga kanan) maya begambar bebala mayuh enggau kaban komiti pengatur Pekit Nenun Pua Kumbu Renggat Ke-Tiga ditu, malam kilah ensana.

SIBU: Sarakup Indu Dayak Sarawak (SIDS) pampang Sibu sekali agi deka ngatur Pekit Nenun Pua Kumbu Renggat Ke-Tiga berengkah ari diatu nyentukka bulan Ogos ti deka datai.

Chairperson SIDS Sibu Ir Alice Jawan madah, patron pekit tu iya nya Sapit Kepala Menteri Datuk Patinggi Tan Sri Alfred Jabu Numpang.

“Tuju pekit tu diatur dikena matak pengerindu orang indu Dayak lebih agi bansa Iban rebak baru ngaga asil pengelandik jari nenun Pua Kumbu,” pia ku iya madah ngagai pengarang berita sepengudah betuaika aum komiti pengatur pekit ditu, malam kilah ensana.

Alice madah, pekit nya deka berengkah diatur ari diatu lalu bala pemekit diberi awak enam bulan nembuka tenun.

“Serak tu pekit dibagi ngagai empat kategori iya nya Kategori Kain Kebat, Kategori Pua Kumbu Selampai, Kategori Selap Mija Kebat enggau Kategori Selampai Tenun.

“Kategori Kain Kebat mesai 3’ X 5’, Kategori Pua Kumbu Selampai (2’ X 6’), Kategori Selap Mija Kebat (24” X 10”) enggau Kategori Selampai Tenun (5” X 6”),” ku iya sambil madah pekit nya tebuka ngagai semua lalu enda milih ikas umur.

Iya madah, champian bagi Kategori Kain Kebat deka mai pulai perais mata duit RM1,500, lumur dua RM1,200, lumur tiga RM900, lumur empat ngagai lima RM500 sereta disempulang setipikit enggau trupi tang enda nyengkaum penuduk lumur empat enggau lima.

“Ba Kategori Pua Kumbu Selampai, champian deka mai perais mata duit RM1,200, lumur dua RM900, lumur tiga RM700 sereta disempulang setipikit enggau trupi.

“Penuduk lumur empat enggau lima mega mai perais mata duit RM500,” ku iya.

Champian pekit Kategori Selap Mija Kebat mai pulai perais mata duit RM800, lumur dua RM600, lumur tiga RM400 lalu disempulang setipikit enggau trupi.

Penuduk lumur empat enggau lima mega mai perais mata duit RM200.

Ba Kategori Selampai Tenun, champian mai pulai perais mata duit RM500, lumur dua RM300, lumur tiga RM200 sereta disempulang setipikit enggau trupi.

Penuduk lumur empat enggau kelima mega mai perais mata duit RM100.

Asil ke ditenun enda tau laun dianjung ngelui 29 Ogos tu.

Pekit mega deka diberi puin pun bulan September lalu palan deka dipadahka udah tu ila.

Sepenyampau 20 lambar tenun ke pemadu manah deka dipandangka ngagai mensia mayuh.

Tiap bengkah tenun ke dianjung mega bisi dikelai enggau ‘Tenun SIDS SIBU 2014’ ba tisi tenun bagi Kategori Kain Kebat, Pua Kumbu Selampai enggau Kategori Selap Mija Kebat lalu Kategori Selampai Tenun mega meseti dikelai enggau ‘SIDS SIBU 2014’ ba ujung selampai.

Puin deka diberi nitihka Ukir (40 persin), Linsu (ngena linsu chulin) (30 persin), Penulin (15 persin) enggau pengalus tenun (15 persin).

“Pemutus pekit deka digerah maya Pengerami Ngintu Penumbuh Ke-25 SIDS Sibu ke dipelaba deka diintu bulan September tu.

“Taja pan baka nya, kitai agi berandauka kemaya enggau dini pengerami tu deka diatur ila,” ku iya madahka baru.

Pom enggau pekit ulih diambi ba laman web SIDS www.sids-sibu.blogspot.com tauka diambi ari sekretariat ke udah dipilih.

Penerang silik tauka asil tenun tau dianjung ngagai Ir Alice Jawan, c/o Lembaga Air Sibu, Jalan Salim (084-211001 sambung 203/205) tauka Angeline Uchi Maseng, c/o Opis Kunsil Menua Pesisir (SRDC), Wisma Sanyan, 96000 Sibu (016-8825861) sebedau 29 Ogos tu.