KUCHING: Pekara bekaul enggau pengarap, enda patut
dibalut pekara politik, lalu enti iya enda diputar enggau manah, iya tau mai
penyarut ngagai mensia mayuh sereta ngeruga pengelikun menua, ku Menteri Pemansang
Tanah Sarawak, Tan Sri Dr James Masing (gambar).
“Pengarap tu hak seseiku, iya enda patut dibalut pekara
politik. Ari keterubah pekara tu nyadi, aku endang enda setuju,” ku Masing.
Iya madah munyi tu lebuh diasuh nimbal sebengkah penemu
ba laman pengawa rama ‘Facebook’ alai seraban orang ke ngumbai diri
‘Semenanjung Anti Sabah enggau Sarawak’ nganu sereta ngemelikka pupu bansa ba
kededua buah nengeri tu.
“Enti deka muru rayat ari kededua buah nengeri tu enda
disengkaum dalam Sempekat Malaysia, nya ukai chara mutarka penanggul ke benung
nuntung diatu,” ku Masing.
Masing ti meg Presiden Parti Rayat Sarawak (PRS) madah,
kitai patut belajar nerima jaku lalau enggau runding ke tebuka laban mayuh jaku
lalau digaga dikena ngemanahka agi gempung Malaysia.
“Orang ari luar Sabah enggau Sarawak patut beratika
perambu sereta jaku lalau rayat ari menua tu.
“Malaysia ditumbuh nengah gempung nengeri lalu iya tetap
nyadi gempung entara nengeri dalam Malaysia. Nya alai, kitai patut bekerejasama
ngemanahka agi penuduk kitai nyadi rayat Malaysia.
“Sida ke ngaga lambar ‘Facebook’ ‘Semenanjung Malaysia
anti Sabah & Sarawak’ nya pan patut ngetuka pengawa begedik baka nya,” ku
iya.
Iya madah munyi tu lebuh dikerandau nyerumba atur pengawa
Ngelalu Pengabang Taun Baru China Parti Sa’ati Rayat Sarawak (SUPP) kena hari
Lima tu tadi.
Masing madah, kadang-kadang amat iya enda entu lantang
meda utai ke digaga Perintah Besai, tang pengawa nya ku iya, deka ngemanahka
agi gempung Malaysia lalu ukai mechahka gempung nya.
“Kadang-kadang aku pan enda lantang ati meda chara
Perintah Besai mutarka isu ‘Allah’ tang ukai reti aku bejaika gempung Malaysia
nya, tang semina ngasuh Perintah Besai bejimat lebuh mutarka isu ‘Allah’ laban
iya besangkut paut enggau rayat Keristin menua tu,” ku iya.
Hari Lima tu tadi, Sapit Menteri Dalam Menua, Datuk Wan
Junaidi Tuanku Jaafar madah, kitai bisi undang-undang, bejejimat, anang
ngelebus adan.
“Nya alai enti orang bejaku peneka ati, asal iya agi
dalam konteks undang-undang menua, Perintah agi ulih ngenatka nya, tang anang
ngelui adan.
“Tang enti udah ngelui adan, polis besedia nangkap orang
nya. Laban kitai pan enggai meda menua kitai ke ngembuan mayuh macham pupu
bansa, pengarap kitai nyadi charut laban utai bansa tu ke tau mai penyarut.
“Nya alai, jaku lalau aku seagi-agi kita bisi hak nulis
blog tauka ‘Twitter’, anang sesekali ngelui pematut,” ku iya.
Bedau lama tu ke udah, lambar ‘Facebook’ ‘Semenanjung
Malaysia Anti Sabah enggau Sarawak’ mantaika gambar (dalam Facebook sida iya)
ngemelika orang Keristin menua tu, nyengkaum ngengkah gambar engkatak ba
regang.
Kelimpah ari ngengkah gambar bansa nya, gerempung tu mega
ngemelika pupu bansa kededua buah nengeri tu.
Naka ke diatu, ripot bisi madahka lambar ‘Facebook’ nya
diatu udah ditutup.