MUKAH: Ketegal suntuk bekal kelimpah nerima peminta
tinggi ngujungka rega ulat mulung tauka matar (tinduh) niki lebih 10 persin ari
rega asal sekumbang beberapa minggu tu ke udah.
Rega matar sebedau tu RM40 sekilogram lalu niki nyentuk
ke RM50 sekilogram.
Matar tauka suah agi dikangau enggau nama ‘si’et’ (jaku
Melanau) endang berega sereta ulih nyungkakka penatai pemisi ke tinggi ngagai
raban penyual.
Seiku penyual matar madah, bekal ulat mulung nya kurang
ketegal mayuh pun mulung ke nyadi sarang pemakai matar nya nyau majak kurang.
Ku iya, mensia mayuh ke rindu makai pemakai eksotik tu
ukai semina peranak menua tu empu tang mega temuai ari menua luar.
“Rega ulat mulung tu niki ari RM40 nyentuk ke RM50
sekilogram, ulat ke udah ditunu tauka ke agi idup dijual enggau rega RM5
sebungkus ke ngundan kurang ari sepuluh iku.
“Aku bulih bekal ulat mulung tu ari peranak genturung
pendiau ke semampai ngasilka produk nya sereta ngiga bekal ke dijual ninting
hari. Sida nganjung ngagai aku antara 500 nyentuk ke 1,000 ulat mulung ninting
hari sebedau dijual di Pasar Tamu Mukah,” ku iya.
Iya madah, mensia mayuh rindu makai ulat mulung laban
ngembuan asiat tinggi sereta diempa enggau sagu sereta asi. Enti bekal chukup,
iya pechaya rega enda niki.
Kelimpah ari nya, ngasilka ulat mulung pun sagu ke
ditebang dilakka sepengelama tiga nyentuk ke empat minggu ngambika ulat nya
besarang.
Taja pia, enda semua pun mulung ngasilka ulat ke mayuh
laban pun ke berisi aja ulih ngasilka pun mulung ke mayuh.
Di Kapit, Sibu, Bintulu, Miri, Betong enggau Kuching ulat
mulung tu dijual nengah rega RM1 nyentuk ke RM2 siku.
0 comments:
Post a Comment