KUCHING: Sapit Presiden parti Pesaka Bumiputera Bersatu
(PBB), Datuk Amar Abang Johari Tun Openg enggai meri penerang sekalika Pengawa
Bepilih Nengeri (PRN) Ke-11 deka diatur tumu tauka enda ari timpuh ke bendar.
Iya ti mega nyadi Menteri Pengawa Berumah ditanya
sekalika PRN Ke-11 diatur tumu tauka enda beduduk ari riput sebengkah surat
kabar kemari.
“Aku enda nemu pasal pekara nya, aku enggai meri sebarang
penerang nangi ke salah, enti aku nemu tentu aku deka meri penerang ngagai kita
(media),” ku iya.
Abang Johari ti mega Menteri Dagang Temuai dikerandau
pengarang berita pengudah nyuaka perais
enggau ampau Taun Baru China 2014, ti diatur SABERKAS di Sarawak Hun Nam Siang
Tng, Jalan Sekama ditu kemari.
Ba sebengkah surat kabar kemari ngeriputka, berita
selebubu Pehin Sri Abdul Taib Mahmud deka nyurutka diri ari megai pengawa nyadi
Kepala Menteri.
Udah nya lalu beganti enggau berita Kunsil Nengeri (DUN)
Sarawak diketuka tumu agi ari timpuh ke patut iya nya April 2016.
Nya beduduk ari sebengkah licha bekaul enggau pengawa
nyikap diri napi PRN Ke-11, bala raban pengelikun, nyengkaum polis ti diatur ba
Opis Kepala Menteri, ditu kena Hari Satu tu tadi.
Pengawa PRN Ke-10 diatur kena 16 April 2011 ti nunjukka
Barisan Nasional (BN) menang 55 sitak Kunsil Nengeri ditangkanka DAP (12), PKR
(3) enggau chalun ngatika diri (1).
0 comments:
Post a Comment